Վաղը լրանում էր ՀՀ քաղաքացիության անձնագրիս գործունեության վերջնաժամկետը: Այսօր ներկայացա անձնագրային բաժին` նոր անձնագիր, ավելի ճիշտ` նույնականացման քարտ ստանալու համար:
Ասեմ, որ աննկարագրելի տհաճ գործընթաց էր:
1. Երեք ժամ նեղ միջանցքում` անկանոն հերթի մեջ (Հնարավոր չէ՞ր նախապես հերթագրման տերմինալներ դնել` ավելորդ հրմշտոցից և անհերթ-արտոնյալ ներս մտնողներից խուսափելու համար):
2. Նախապես ինչ որ բան ճշտելու գրեթե անհնարինություն:
3. Անհրաժեշտ գործողությունների, պահանջվող փաստաթղթերի իրազեկման գրեթե բացակայություն (հերթում սպասելու ժամանակ հասցրեցի կարդալ գրեթե բոլոր փակցված թղթերը)*:
* Հին անձնագրի հանձնման և նորի համար ձևակերպումներ անելու համար բանավոր ասացին, որ մինչև 50 տարեկան տղամարդկանց համար պետք է ներկայացվեն նաև զինվորական գրքույկները: Հարկադրված կատարվեց լրացուցիչ ծախս` արագ տաքսիով տեղաշարժվելու համար` նաև այդ փաստաթուղթը ներկայացնելու նպատակով:
Կարծում եմ, որ դժվար չէր հանրային տեղեկատվական միջոցներով կամ իրազեկող ցուցանակներով այդ մասին նախապես ծանուցել մարդկանց` ավելորդ լարվածությունից ու քաշքշուկից ազատելու համար:
4. Նոր փաստաթղթի տրամադրման սահմանված ժամկետի խախտում ( փաստորեն այսօր`28.02.2014թ-ին, նոր անձնագիր ստանալու համար, տնից երեք անձ դիմեցինք, որոնցից երկուսիս համար ստանալու ժամկետ սահմանվեց 28.02.2014թվականը, իսկ մեկի համար` 04.04.2014թվականը: Բացի այդ, ասացին, որ ինչ ամսաթիվ գրված է տրամադրված կտրոնի վրա` ներկայանանք դրանից առնվազն մեկ շաբաթ անց):
5. Պարզվեց, որ նույնականացման քարտի համար սահմանված վճարելիք 3000 դրամի փոխարեն` պետք է վճարենք 3300 դրամ, լրացուցիչ 300 դրամը` որպես միջնորդավճար, չնայած այդ մասին ոչ մի ճանապարհով նախապես չեն ծանուցում:
Մի խոսքով` հիասթափեցնող գործընթաց …
Հ.Գ. Անձնագրային բաժնից դուրս գալուց, բաժնի պետի դռան վերնամասում, նկատեցի մի ցուցանակ` բառացի լավ չեմ հիշում, բայց մոտավորապես հետևյալ գրությամբ` «Անձնագիրը հայրենասիրության նշան է»: Չգիտեմ, թե այդ մտքի հեղինակն ինչ է նկատի ունեցել, բայց ես լռեյալն ժպտացի ու հեռացա …
